Klopp: „Oxlade-Chamberlain og Brewster eru eins og nýir leikmenn“

Jurgen Klopp ætlar ekki að gera mikið á leikmannamarkaðinum í sumar. Hann segir leikmenn eins og Rhian Brewster og Alex Oxlade-Chamberlain vera eins og nýir leikmenn.

Liverpool byrjaði undirbúningstímabilið sitt af krafti í gærkvöld með 6-0 sigri á nágrannaliði sínu Tranmere Rovers. Rhian Brewster var á meðal markaskorara í leiknum og setti hann tvö mörk.

Til þessa í sumar í leikmannaglugganum hefur Liverpool fengið til sín unglinginn Sepp van den Berg.

„Við erum búnir að kaupa leikmenn. Oxlade-Chamberlain, Rhian Brewster, þeir spiluðu ekki á síðasta ári. Allir ungu strákarnir sem spiluðu í dag, þeir eru nýir leikmenn fyrir okkur,“ sagði Klopp eftir leikinn.

„Við sjáum til hvað við gerum, en ég held ekki að þetta verði stærsti félagsskiptagluggi allra tíma.“