Enski boltinn

Pickford ver de Gea: „Getur ekki gagnrýnt markmann fyrir einn leik“

Ástrós Ýr Eggertsdóttir skrifar
David de Gea
David de Gea vísir/getty
Everton-maðurinn Jordan Pickford hefur tekið upp hanskann fyrir kollega sinn í marki Manchester United, David de Gea, og segir gagnrýni á hann sýna hversu góður hann hafi verið.

Spænski markvörðurinn hefur fengið mikla gagnrýni síðustu vikur en hann gerði stór mistök í þremur síðustu leikjum Manchester United, þar á meðal í 4-0 tapinu fyrir Everton.

De Gea hefur verið einn allra besti leikmaður Manchester United síðustu ár, og varði mark úrvalsliðs deildarinnar síðustu fjögur tímabil. Í gær var úrvalslið þessa tímabils kynnt og var de Gea hvergi að sjá, enda ekki búinn að ná sömu hæðum.

„Það eiga allir slæma leiki. Að mínu mati er de Gea einn besti markmaður heims og mér finnst hann stórkostlegur,“ sagði Pickford.

„Það er frábært að fylgjast með honum, hversu góður hann er og hvernig hann hefur þróast, það er magnað.“

„Þú getur ekki gagnrýnt markmann fyrir einn leik. Það sýnir bara hversu góður hann hefur verið allt tímabilið.“

De Gea hefur bara náð að halda marki sínu hreinu sjö sinnum í deildinni í vetur og fengið á sig 50 mörk þegar þrír leikir eru enn eftir í deildinni. Á síðasta tímabili fékk hann á sig 28 mörk og hélt markinu hreinu 18 sinnum.




Fleiri fréttir

Sjá meira


×