Fyrrum stjarna United tæki Guardiola fram yfir Mourinho

Rússinn Andrei Kanchelskis er einn fárra leikmanna sem spilað hafa fyrir bæði liðin í Manchester-borg. Hann vildi frekar sjá Guardiola í brúnni hjá United heldur en Mourinho.

Kanchelskis kom til Manchester United árið 1991. Hann var hluti af fyrsta góða United-liði Sir Alex Ferguson og vann með félaginu tvo Englandsmeistaratitla og tvo bikartitla.

Árið 1995 yfirgaf Kanchelskis United fyrir Everton þegar ungstirnið David Beckham var farinn að stela mikið af spilatíma Rússans. Hann snéri svo aftur til Manchester-borgar sex árum síðar, þá til að spila í ljósbláa búningnum.

„Við vorum á botni deildarinnar og í landsleikjahléi þá fórum við til Marbella,“ rifjar Kanchelskis upp við breska blaðið Independent. Hann var í sex mánuði hjá City, á láni frá Everton. „Marbella! Reyktum, drukkum og fögnuðum. Ég veit ekki afhverju við fórum, þetta var hræðilegt. En þetta var City á þessum tíma.“

Kanchelskis ber mun meiri taugar til rauða hluta Manchester-borgar heldur þess bláa, og er enn stuðningsmaður United. Hann er hins vegar hrifnari af leikstíl Pep Guardiola heldur en varnarsinnaðs leiks Jose Mourinho.

„Í dag lítur City betur út, á hærra plani heldur en United. Ég verð óánægður yfir sumum United leikjum. Þetta er ekki eins og við spiluðum undir Ferguson. Við spiluðum alltaf með vængmenn. Núna er það City sem spilar með vængmenn og þeir skora mikið af mörkum,“ sagði Kanchelskis.

„Mourinho spilar mun varnarsinnaðar. Þegar ég var að spila, þá spiluðum við til þess að njóta. Við vorum að spinna, stundum spiluðum við öðruvísi. Cantona, Giggs, ég, Mark Hughes. Núna, að mínu mati, eru einn eða tveir góðir leikmenn í liðinu. Rashford er góður, en de Gea er besti leikmaðurinn. Ef ekki væri fyrir de Gea væri United ekki í öðru sæti, heldur fimmta eða sjötta.“

Spurður hvort hann hefði frekar viljað sjá Guardiola á Old Trafford heldur en Mourinho sagði Kanchelskis einfaldlega: „Í augnablikinu, já.“

„Ég vona að United vinni. En ef þeir tapa á sunnudaginn þá er þetta búið. Það verður enginn möguleiki, 11 stig eru of mikið,“ sagði Andrei Kanchelskis.