Morata: Ég þarf meiri tíma

Spánverjinn Alvaro Morata vill fá meiri tíma til þess að aðlagast ensku úrvalsdeildinni. Þetta sagði hann í viðtali við vefsíðu Chelsea.

Morata hefur ekki byrjað eins vel og menn vonuðust eftir með Englandsmeisturum Chelsea. Hann misnotaði vítaspyrnu í leiknum um Samfélagsskjöldinn og klúðraði dauðafæri á móti Tottenham. 

Þrátt fyrir það skoraði framherjinn sitt annað mark í tveimur leikjum á Stamford Bridge þegar Chelsea sigraði Everton um helgina. 

„Ég er ánægður með að hafa skorað, gefið stoðsendingu og að liðið vann,“ sagði Morata.

„Það er mikilvægt fyrir mig að fá að spila og aðlaga leik minn. Það er ekki auðvelt að koma í nýtt land, nýja deild og nýjan leikstíl. Ég þarf tíma til að aðlagast ensku úrvalsdeildinni. Liðsfélagar mínir eru að hjálpa mér með það og mér líður mjög vel hérna.“

Morata kom til félagsins til þess að fylla skarð Diego Costa, sem neitar að snúa aftur til Englands. Þessi 24 ára framherji segist þó ekki vera með neitt markmið í markaskorun.

„Ef ég fer að hugsa út í það ætti ég bara að fara að spila tennis. Það skiptir mig engu máli [hvort hann skori mörk], ég vil bara vinna. Þetta er liðsíþrótt.“