Átök í Venesúela: Hvetur mótmælendur til að halda ótrauða áfram

Ramon Muchacho, bæjarstjóri hins ríka Chacao hverfisins í Venesúela, hefur neyðst til þess að flýja átakasvæðið í höfuðborginni Caracas. Var hann í gær dæmdur til 15 mánaða fangelsis fyrir að styðja ekki við áætlanir ríkisstjórnarinnar og neita að koma í veg fyrir mótmæli. Muchacho er fjórði bæjarstjórinn á fimmtán dögum til að vera dæmdur fyrir að sporna ekki við mótmælum. Reuters greinir frá.

Muchacho sendi frá sér myndband í útlegð sinni þar sem hann hvetur mótmælendur ríkisstjórnarinnar og forseta landsins, Nicolas Maduro, að halda ótrauð áfram. Nicolas Maduro jók völd sín nú fyrr í mánuðinum þegar nýtt stjórnlagaþing var kosið í landinu sem styður sósíalískar áherslur hans.

Glæðir mótmælin nýju lífi

Chacao hverfið hefur verið ein af miðjum mótmæla gegn Maduro og talið er að myndband Muchacho muni glæða mótmælin nýju lífi en undanfarið voru mótmælin farin að dvína. Fleiri en 125 einstaklingar hafa látið lífíð í óeirðunum síðan að stjórnarandstæðingar hófu að mótmæla í apríl síðastliðinn. Vildu þeir að forsetakosningum yrði flýtt þar sem Maduro yrði líklegur til taps.

Vinsældir forsetans hafa dvínað gífurlega eftir að mikil efnahagskreppa hefur verið þar í landi sem kristallast í matar- og lyfja skorti. Þá er verðbólgan í landinu komin í þriggja stafa tölu.

Ákvarðanir nást ekki í gegn

Stjórnarandstaðan tók yfir þingið árið 2015. Ákvarðanir hennar náðu hins vegar ekki í gegn þar sem hæstiréttur í landinu, sem hallur er undir Maduro og flokk hans, felldi ákvarðanir hennar úr gildi. Stjórnarandstaðan tók ekki þátt í kosningum um stjórnlagaþingið sem skipað er 535 einstaklingum.

Stjórnlagaþingið er sagt vera tilraun til að eyða öllum vafa um völd forsetans. Hefur það meðal annars vald til að endurskrifa stjórnarskrána og veita Maduro völd til að stjórna með forsetatilskipunum. Þá hefur stjórnlagaþingið einnig lagt sig fram við að fjarlægja embættismenn sem styðja ekki við forsetann að þeirra mati. Sú fyrsta til að vera látin fara var Louisa Ortego, ríkissaksóknari, en hún hafði ásakað forsetann um mannréttindabrot.

Refsiaðgerðum fjölgað

Ríkisstjórn Donalds Trumps, forseta Bandaríkjanna, hefur nú fjölgað refsiaðgerðir gegn embættismönnum Venesúela og hafa átta embættismenn bæst við. Þar með talið er bróðir fyrrverandi forseta landsins, Hugo Chacez. Var þetta gert til að refsa þeim fyrir að hafa aðstoða við að byggja upp hið nýja stjórnlagaþing.

Yfirvöld í Washington hafa nú þegar beitt refsiaðgerðum gegn þrettán embættismönnum landsins auk gegn forsetanum sjálfum. Með því hafa þeir fryst eignir mannanna, banna þeim að ferðast til Bandaríkjanna og að lokum banna þeim Bandaríkjamönnum að eiga í viðskiptum við þá.

Maduro hefur hins vegar kennt hinu bandaríska veldi um stöðu landsins og að stjórnlagaþingið hafi verið stofnað til að auka frið og velsæld í landinu.