Gylfi markahæstur hjá Swansea í efstu deild

Gylfi Þór Sigurðsson varð á sunnudag markahæsti leikmaður Swansea í efstu deild frá upphafi er hann skoraði sitt 33. úrvalsdeildarmark fyrir félagið í 2-1 tapi gegn Manchester City.

Þar með tók hann fram úr Bob Latchford sem spilaði með Swansea frá 1981 til 1984 og skoraði 32 mörk fyrir félagið í gömlu 1. deildinni. Gylfi varð í fyrra markahæsti leikmaður Swansea í úrvalsdeildinni sem var stofnuð árið 1992.

„Guði sé lof fyrir Gylfa Sigurðsson,“ segir í fyrirsögn South Wales Evening Post um afrekið en ljóst er að nafn Gylfa er nú skráð stórum stöfum í sögubækur félagsins.

Þrátt fyrir tapið um helgina hefur Swansea gengið betur að undanförnu eftir erfitt haust og hafði unnið þrjá af síðustu fjórum leikjum á undan. Fyrir vikið komst Swansea úr fallsæti og er það ekki síst frammistöðu Gylfa að þakka en hann hefur skorað í síðustu þremur leikjum Swansea.

„Engin furða að Paul Clement þjálfari telur að Sigurðsson sé nógu góður til að spila með liðum eins og Real Madrid og Bayern München,“ sagði greinahöfundur en í greininni eru mörk Gylfa greind með nákvæmum hætti.

Sjá einnig: Sky Sports: Gylfi fær ekki fyrirsagnirnar en er líklega vanmetnastur í deildinni

Kemur meðal annars fram að Gylfi hefur skorað sín 33 úrvalsdeildarmörk í 110 leikjum fyrir félagið og að hann skori því í 30 prósent leikja sinna sem sé frábær tölfræði fyrir miðjumann.

Hann sé með betra markahlutfall en leikmenn á borð við Christian Eriksen, Ross Barkley, Eden Hazard og Kevin de Bruyne.

Þá er enn fremur bent á að í þeim 31 leikjum sem Gylfi hefur skorað hefur Swansea aðeins tapað tíu þeirra. Alls hafa sextán unnist og Swansea hefur fengið alls 53 stig þegar Gylfi hefur verið á skotskónum.

Sjá einnig: Enginn miðjumaður í ensku úrvalsdeildinni býr til fleiri mörk en Gylfi Þór

Þetta tímabilið hefur Gylfi átt beinan þátt í fimmtán af 29 mörkum Swansea og á þar með beinan þátt í tólf af 21 stigi liðsins á tímabilinu.

Gylfi á þó meira inni á Liberty-vellinum, heimavelli Swansea, þar sem 21 marka hans hafa komið á útivelli en Gylfi hefur skorað gegn nítján mismunandi liðum á ferlinum með Swansea - þar af öllu stóru liðunum (Chelsea, Manchester City, Manchester United, Tottenham, Arsenal og Liverpool).