Gylfi getur vel spilað með fjórum bestu liðum Englands

Gylfi Þór Sigurðsson, landsliðsmaður Íslands í fótbolta, heldur áfram að fara á kostum með liði sínu Swansea í ensku úrvalsdeildinni í fótbolta. Hafnfirðingurinn skoraði sjötta mark sitt á árinu og það áttunda í heildina á tímabilinu þegar hann tryggði velska liðinu gríðarlega mikilvægan 1-0 sigur á Norwich síðastliðinn laugardag.

Gylfi Þór er ein helsta ástæða þess að Swansea fjarlægist falldrauginn, en liðið er nú níu stigum frá fall­svæðinu og þarf eftir því sem Sam Allardyce, knattspyrnustjóri Sunder­land, segir aðeins fimm stig til viðbótar til að halda sæti sínu. Aldrei áður hefur verið jafn mikilvægt að halda sér í deildinni, en frá og með næsta tímabili verða meira að segja lélegustu lið úrvalsdeildarinnar á meðal þeirra ríkustu í Evrópu þegar nýr sjónvarpssamningur tekur gildi.

Það eru góð tíðindi fyrir íslenska landsliðið að Gylfi er í jafn miklum ham og raun ber vitni, en þessa stundina eru það Walesverjarnir sem græða á gæðum hans. Síðustu þrjú mörk Gylfa hafa tryggt liðinu fimm mikil væg stig, en hann skoraði einnig jöfnunarmark gegn Everton í lok janúar í sigurleik þar sem Swansea fékk þrjú stig.

Aldrei fleiri mörk

Þrátt fyrir að níu umferðir séu enn eftir í ensku úrvalsdeildinni er Gylfi Þór nú þegar búinn að bæta persónulegt met sitt í markaskorun. Eftir að byrja afskaplega rólega og vera ólíkur sjálfum sér fyrir áramót eru mörkin í heildina orðin átta í úrvalsdeildinni. Hann skoraði sjö í fyrra sem var jöfnun á persónulegu meti hans. Gylfi sló í gegn þegar hann kom fyrst á láni til Swansea í úrvalsdeildinni seinni hluta tímabils 2012/2012 og skoraði þá sjö mörk í 18 leikjum.

Gylfi hefur aðeins einu sinni skorað meira í efstu deild, en það gerði hann sem leikmaður Hoffenheim í þýsku 1. deildinni tímabilið 2010/2011. Þá skoraði miðjumaðurinn magnaði níu mörk í 29 leikjum. Besti árangur hans í meistaraflokki eru 17 mörk í 38 leikjum fyrir Reading 2009/2010 en það var í næstefstu deild.

Í heildina er Gylfi Þór búinn að skora 30 mörk í ensku úrvalsdeildinni í 137 leikjum sem gerir 0,22 mörk af miðjunni í leik. Ekki slæmt. Hann tók fram úr Heiðari Helgusyni með markinu á móti Crystal Palace á dögunum, en Heiðar skoraði 28 mörk í 96 leikjum (0,30 í leik) fyrir Watford, Fulham, Bolton og QPR á sínum ferli. Eiður Smári Guðjohnsen er markahæstur Íslendinga í ensku úrvalsdeildinni með 55 mörk í 211 leikjum (0,26 í leik) fyrir Chelsea og Tottenham.

Ísland truflaði kannski

„Eftir að byrja tímabilið ekki vel hefur Gylfi verið í miklu stuði síðustu vikur og skorað mikilvæg mörk. Ekkert mark þó jafn mikilvægt og sigurmarkið gegn Norwich. Hann var langbesti maður vallarins og kom liðinu lengra frá fallsvæðinu,“ segir velski blaðamaðurinn Stephen Ware í viðtali við Fréttablaðið.

Ware er blaðamaður á South Wales Evening Post og hefur það sem aðalstarf að fjalla um Swansea. Hann nefnir tvennt til sögunnar aðspurður hvers vegna hann heldur að Gylfi Þór hafi ekki verið að spila nógu vel fyrir áramót.

„Gylfi var spurður að því eftir leikinn á laugardag og sagði nú að hann hefði kippt því í lag ef hann vissi það sjálfur. Ég held að íslenska landsliðið hafi kannski aðeins verið að trufla hann. Það tók vafalítið mikið á bæði andlega og líkamlega að spila svona vel fyrir sína þjóð og koma liðinu á EM. Það er erfitt að spila svona vel fyrir tvö lið á sama tíma,“ segir Ware, en salan á Jonjo Shelvey til Newcastle hjálpaði líka til.

„Garry Monk notaði Gylfa með Shelvey á miðjunni og þeir eru frekar svipaðir leikmenn. Báðir vilja fara fram og skora þannig að kannski voru þeir hvor fyrir öðrum. Nú fær Gylfi meira pláss. Hann er einn allra mikilvægasti leikmaður liðsins og skilar miklu til þess. Meira að segja þegar hann var ekki að spila nógu vel hrósaði Garry Monk honum alltaf fyrir hvað hann lagði mikið á sig bæði á æfingum og í leikjum,“ segir Ware.

Nógu góður fyrir þau bestu

Velski blaðamaðurinn segir lítið slúður í gangi um möguleg félagaskipti Gylfa í sumar. „Það var nú ekki mikið að gerast í síðasta glugga því hann var ekki að spila eins og hann á að sér. Ég veit ekki alveg hvernig hann lítur á þetta og hvort hann vilji fari því hann var náttúrlega áður hjá Tottenham. Þar fékk hann lítið að spila og kannski vill hann ekki taka þá áhættu aftur,“ segir Ware.

Ware efast ekki um að Gylfi geti spilað með bestu liðum deildarinnar verði hann til sölu í sumar, en íslenski landsliðsmaðurinn fær auðvitað risastóran glugga til að sanna sig enn frekar á Evrópumótinu í sumar.

„Hann getur alveg spilað með fjórum bestu liðunum að mínu mati, en að minnsta kosti topp sex. Gylfi er algjör gæðaleikmaður með frábærar aukaspyrnur. hann skorar mörk af miðjunni og þannig leikmenn eru eftirsóttir,“ segir Stephen Ware.