Aron Einar fékk aftur hæstu einkunn leikmanna Cardiff

Cardiff City vann afar mikilvægan sigur, 2-1, á Wolves í Íslendingaslag í ensku B-deildinni í gær.



Með sigrinum lyfti Cardiff sér upp í 19. sæti deildarinnar en liðið er nú þremur stigum frá fallsæti.

Aron Einar Gunnarsson lék allan leikinn á miðju Cardiff. Félagi hans í íslenska landsliðinu, Jón Daði Böðvarsson, kom inn á sem varamaður á 76. mínútu í liði Wolves.

Aron Einar fékk góða dóma fyrir frammistöðu sína í leiknum í gær. Hann fékk t.a.m. átta í einkunn hjá WalesOnline en enginn leikmaður Cardiff fékk hærri einkunn en landsliðsfyrirliðinn. Í umsögn WalesOnline segir að Aron Einar hafi verið ábyrgur og áreiðanlegur í leiknum.

Aron Einar fékk einnig átta í einkunn hjá WalesOnline og var valinn maður leiksins í 1-1 jafnteflinu gegn Ipswich Town á laugardaginn. Aron Einar skoraði mark Cardiff í þeim leik.

Aron Einar hefur verið fastamaður í liði Cardiff frá því Neil Warnock tók við þjálfun þess í byrjun október en þessi þrautreyndi stjóri hefur mikið álit á íslenska landsliðsmanninum.

Með því að smella hér má lesa viðtal sem Guðmundur Benediktsson tók við Aron Einar. Þar ræðir hann m.a. um Warnock.