Þekktur barnaníðingur fluttur á sjúkrahús eftir að hafa fundist meðvitundarlaus

Barnaníðingurinn Barry Bennell fannst meðvitundarlaus í húsi í Knebworth Park, Stevenage, á föstudagskvöldið.

Bennell hefur verið mikið í fréttum undanfarna daga eftir að glæpir hans gegn drengjum voru dregnir fram í dagsljósið.

Bennell þjálfaði yngri flokka hjá Crewe Alexandra á sínum tíma. Hann starfaði einnig hjá Manchester City og Stoke City.

Fyrr í mánuðinum steig Andy Woodward, fyrrverandi leikmaður Crewe fram, greindi frá því að Bennell hefði misnotað hann. Fleiri hafa svo fylgt í kjölfarið, m.a. David White, fyrrum leikmaður Man City og Leeds United.

Bennell fékk fjögurra ára dóm fyrir að nauðga breskum dreng í fótboltaferð á Flórída 1994 og níu ára dóm 1998 fyrir 23 kynferðisbrot gegn níu drengjum. Bennell var svo dæmdur í fangelsi í fyrra eftir að hafa játað að hafa misnotað dreng í fótboltabúðum í Macclesfield 1980.

Í yfirlýsingu frá lögreglu segir að hún hafi verið kölluð til á föstudagskvöldið vegna þess að talið var að mannslíf væri í hættu. Hinn 62 ára gamli Bennell var fluttur á sjúkrahús þar sem hann dvelur núna. Lögreglan segir að ekki sé hægt að greina nánar frá líðan hans á þessari stundu.