Fyrrum leikmaður Wigan fannst látinn

Staðfest var í dag að Steve Gohouri sem lék í þrjú ár með Wigan Athletic í ensku úrvalsdeildinni hafi fundist látinn í Þýskalandi á dögunum.

Gouhouri sem var 34 árs gamall varnarmaður kom upp í gegnum unglingastarf Paris Saint-Germain og lék alls 13 landsleiki fyrir hönd Fílabeinsstrandarinnar.

Lék hann meðal annars með Borussia Mönchengladbach í þýsku úrvalsdeildinni og Young Boys og Vaduz svissnesku úrvalsdeildinni á ferlinum.

Gouhouri hafði verið á flakki undanfarin ár eftir að hafa verið leystur undan samningi hjá Wigan en hann var á mála hjá 4. deildarliðinu TSV Steinbach í Þýskalandi.

Var lýst eftir honum á milli jóla og nýárs eftir að hann skilaði sér ekki heim úr jólafögnuði félagsins.