Fjögurra ára stúlka fannst á lífi undir líki eldri systur sinnar

Fyrstu fjöldaútfarir fórnarlamba jarðskjálftans á Ítalíu fóru fram í dag. Á sama tíma heldur rústabjörgun áfram, en lítil von er þó um að nokkur finnist á lífi. Tala látinna fer áfram hækkandi og er nú staðfest að minnst 290 hafi farist.

Hundruð manna kom saman til að fylgja til grafar 35 af fórnarlömbum náttúruhamfaranna, í bænum Arquata í dag. Athöfin fór fram í íþróttasal og var sjónvarpað á stórum skjám fyrir utan, þar sem ekki var nægilegt húsrúm fyrir syrgjendur. Líkkistum var stillt upp í röðum, þar á meðal tvær hvítmálaðar barnakistur. 

Í annarri þeirri hvílir hinn 9 ára gamla Giulia Rinaldo, eitt yngsta fórnarlamb skjálftans. Yngri systur hennar, Giorgiu, var bjargað úr rústum heimilis þeirra og átti hún fjögurra ára afmæli í dag. Það varð henni til lífs að hún lá undir látinni systur sinni. Opinber þjóðarsorg hófst á Ítalíu í dag og var flaggað í hálfa stöng um landið allt.

Ítalska jarðfræðistofnunin segir að yfir 13 hundruð eftirskjálftar hafi riðið yfir svæðið frá skjálftanum stóra aðfaranótt miðvikudags. Um fjögur þúsund sérfræðingar og sjálfboðaliðar eru enn að störfum á hamfarasvæðinu yfir helgina, bæði við hreinsunarstarf og leit. Minnst níu lík fundust í húsarústum í dag og er tala látinna þar með komin upp í 290 manns.

Langflest dauðsföll urðu í bænum Amatrice, þar sem 230 létust. Nánast allar sögulegar byggingar bæjarins eru rústir einar. Íbúar óttast nú að mörg smáþorpanna á áhrifasvæðinu séu nú dæmd til að verða yfirgefnir draugabæir.

Hér að neðan má sjá myndir frá útförinni í dag sem teknar voru fyrir EPA myndaveituna.