Gylfi Þór sér ekki eftir því að hafna Liverpool

Gylfi Þór Sigurðsson spilar sinn 100. leik í ensku úrvalsdeildinni á mánudagskvöldið eftir viku þegar Swansea tekur á móti Liverpool sem hefur ekki tapað deildarleik á árinu.

Þar mætir Gylfi Þór manninum sem gaf honum fyrstu tækifærin í enska boltanum, Brendan Rodgers, knattspyrnustjóra Liverpool. Rodgers tók Gylfa inn í liðið hjá Reading á sínum tíma og fékk hann á lán til Swansea frá Hoffenheim í janúar 2012.

Sjá einnig:Sjáið öll mörkin hans Gylfa á tímabilinu | Myndbönd

„Þar sem ég tengdist Brendan virtist það líklegra í fjölmiðlum að ég færi til Liverpool í stað Tottenham,“ segir Gylfi Þór um vistaskiptin frá Hoffenheim til Englands sumarið 2012.

„Tottenham sýndi bara mikinn áhuga á þeim tíma og í liðinu voru leikmenn eins og Gareth Bale. Þar leit allt mjög vel út.“

Gylfi Þór sér ekki eftir því að hafa farið til Tottenham þó leiktíðirnar tvær á White Hart Lane hafi verið upp og ofan fyrir miðjumanninn.

„Ég hef alltaf sagt að ég naut mín hjá Spurs. Ég bætti mig sem leikmaður þannig ég lít ekki til baka og hugsa um hvað hefði getað gerst,“ segir Gylfi.

„Auðvitað var mikið um breytingar á liðinu á þessum tveimur árum og nýjir leikmenn voru fengnir til liðsins. En ég mun alltaf minnast tímans þar sem jákvæða reynslu.“

Gylfi Þór hefur ekkert nema góða hluti um Brendan Rodgers að segja, en undir hans stjórn er Liverpool-liðið á miklum skriði á nýju ári.

„Hann er maðurinn sem gaf mér fyrst tækifæri í aðalliðinu. Ég spilaði mína fyrstu leiki hjá Reading undir hans stjórn og hann fékk mig til Swansea. Ég verð honum alltaf þakklátur,“ segir Gylfi Þór.

„Brendan er frábær knattspyrnustjóri. Hann er góður í samskiptum og verndar sína leikmenn. Hann er búinn að komast í gegnum tíma þar sem fólk vildi hann í burtu frá Anfield. En hann kom til baka sterkari og liðið er að spila mjög vel.“