Norður-Kórea skiptir um tímabelti

Yfirvöld í Norður-Kóreu hafa ákveðið að skipta um tímabelti, og fara yfir í sitt eigið, frá og með 15.ágúst næstkomandi.  Klukkan verður færð aftur um þrjátíu mínútur en það er gert til að fagna sjötíu ára sjálfstæði ríkisins, að því er segir í þarlendum fjölmiðli. Staðartími í Norður- og Suður-Kóreu hefur hingað til verið sá sami og í Japan, eða níu tímum á undan Greenwich-tímanum.  

Tímabeltið hlýtur nafnið Pyongyang time, í höfuðið á höfuðborginni. Norður-Kóreskur fjölmiðill segir að með þessu sé verið að uppræta áhrif hinna illu japönsku heimsvaldasinna sem hafi svipt landið staðartíma þess, þegar þeir höfðu yfirráð yfir Kóreuskaganum.