Kane er ekki til sölu

Eftir rólega byrjun á tímabilinu hefur heldur betur kviknað á Harry Kane, framherja Tottenham.

Hann skoraði tvö mörk í 3-0 sigri á Norwich á annan dag jóla og er kominn með 11 mörk í deildinni í vetur. Hann er búinn að skora 27 mörk árið 2015 og hefur slegið met Teddy Sheringham yfir flest mörk á einu ári hjá félaginu.

Á síðustu leiktíð skoraði Kane 31 mark í öllum keppnum og honum hefur tekist að halda áfram að skora þrátt fyrir efasemdir margra.

Ríkustu lið deildarinnar eru eðlilega farin að líta hann hýru augu en stjóri liðsins, Mauricio Pochettino, segir að framherjinn sé ekki til sölu.

„Það er ekki verðmiði á honum. Það getur enginn keypt hann. Kane er ekki til sölu og það er ekki hægt að verðleggja hann,“ sagði Pochettino.