Pep er líklega besti þjálfari heims

Jürgen Klopp, stjóri Liverpool, er mjög spenntur fyrir því að fá Pep Guardiola í enska boltann.

Guardiola hefur þegar gefið út að hann fari frá Bayern næsta sumar en ekki hefur verið staðfest hvert hann fari. Hann er sterklega orðaður við bæði Man. City og Chelsea.

„Ef þessi orðrómur er jafn sannur og aðrir orðrómar hér í landi þá fer hann líklega eitthvert annað,“ sagði Klopp og skaut þar með fast á enska fjölmiðla.

„Ef af þessu verður í alvörunni þá er deildin líklega að fá besta þjálfara heims. Það myndi gera verkefnið enn erfiðara fyrir öll önnur lið deildarinnar.“

Klopp og Guardiola tókust oft hraustlega á er þeir stýrðu sínum liðum í þýska boltanum og Guardiola kallaði það heiður að vera í baráttu við Klopp.