Styttist í endurkomu Henderson

Jordan Henderson, fyrirliði Liverpool, er enn að jafna sig eftir að hann fótbrotnaði í ágústmánuði en hann segist í samtali við fjölmiðla ytra allur að vera að koma til.

Henderson hefur ekki spilað með Liverpool síðan að liðið vann Bournemouth, 1-0, í upphafi tímabilsins en síðan þá hefur félagið skipt um stjóra. Brendan Rodgers var rekinn og Jürgen Klopp ráðinn í hans stað.

„Þetta er allt að koma hjá mér,“ sagði hann í samtali við Sky Sports. „Ég hef sjaldan verið svona lengi frá og þetta hefur verið erfitt. En það er vonandi stutt í þetta hjá mér.“

Ekkert hefur verið gefið út um mögulega endurkomu Henderson nema að vonast er til að hann spili í nóvember. Liverpool vann frábæran 4-1 sigur á Manchester City um helgina og Henderson hrósaði sínum mönnum fyrir frammistöðuna.

Sjá einnig: Liverpool rúllaði yfir Manchester City

„Vonandi höfum við gefið tóninn fyrir restina af tímabilinu. Það kom í ljós hversu vel við getum spilað. Við þurfum að halda stöðugleika og spila með jafn miklu frelsi og við gerðum á laugardaginn.“

„Nýi stjórinn hefur haft mikil áhrif og hefur verið frábær fyrir bæði Liverpool og ensku úrvalsdeildina. Vonandi getum við haldið áfram að læra af honum og bæta okkar leik.“