Sturridge farinn að æfa aftur á fullu

Daniel Sturridge, framherji Liverpool, er farinn að æfa af fullum krafti á ný eftir langvarandi meiðsli og það styttist því óðum í fyrsta leik hans undir stjórn knattspyrnustjórans Jürgen Klopp.

Næsti leikur Liverpool er á móti Manchester City á laugardaginn kemur og það eru miklar líkur að Sturridge geti spilað þann leik.

Sturridge meiddist á hné á æfingu fyrir fyrsta leik Jürgen Klopp á móti Tottenham 17. október og hefur því enn ekki spilað fyrir Þjóðverjann.

Sturridge er einn af mörgum leikmönnum sem hafa meiðst á fyrstu dögum Klopp á Anfield en meðal þeirra eru bakvörðurinn Joe Gomez og framherjinn Danny Ings sem verða ekkert meira með á leiktíðinni.

Daniel Sturridge spilaði síðast með Liverpool í 1-1 jafntefli á móti Everton 4. október en skoraði tvö mörk í 3-2 sigri á Aston Villa í leiknum á undan.

Sturridge hefur aðeins spilað 3 af fyrstu 12 deildarleikjum Liverpool á tímabilinu því hann missti af fyrstu fimm leikjunum vegna meiðsla á mjöðm.

Daniel Sturridge var líka mikið meiddur á síðustu leiktíð og margir velta því fyrir sér hvort Liverpool geti hreinlega treyst mikið á hann.

Liverpool þarf samt nauðsynlega á þessum sterka framherja að halda enda hefur gengið illa að skora mörk á þessu tímabili.