Heimavinnan borgaði sig hjá Gylfa um helgina

Gylfi Þór Sigurðsson skoraði frábært mark fyrir Swansea City í ensku úrvalsdeildinni um helgina en hann segir frá því í viðtali við heimasíðu Swansea að heimavinnan hafi heldur betur borgað sig.

Gylfi jafnaði metin í 1-1 með marki beint úr aukaspyrnu og Swansea skoraði síðan sigurmarkið rétt fyrir leikslok.

Þetta var fyrsta aukaspyrnumark Gylfa í tíu mánuði eða síðan að hann skoraði á móti Aston Villa í desember síðastliðnum.

Viss um að markvörðurinn myndi ekki hreyfa sig

„Þetta var frekar opinn leikur en hvorugt liðið var að ná að skapa sér góð færi. Það var því mikilvægt að ég náði að skora úr föstu leikatriði," sagði Gylfi í viðtali á heimasíðu Swansea City.

„Það var svolítið liðið síðan að ég skoraði síðast úr aukaspyrnu og sú síðasta var einnig á móti Villa. Ég rifjaði hana upp fyrir leikinn og var viss um að markvörðurinn myndi ekki hreyfa sig," sagði Gylfi.

„Ég horfði á hvað hann gerði þegar ég skoraði hjá honum síðast. Það hafði mikið um það að sega í hvaða horn ég skaut," sagði Gylfi.

Viss um að hann væri á leið í markið

„Þeir voru með fimm stóra stráka í varnarveggnum en ég hitti boltann vel og um leið og boltinn fór yfir vegginn þá var ég viss um að hann væri á leiðinni í markið," sagði Gylfi.

„Við fengum trúna á okkur með þessu marki og fengum tuttugu mínútur til að vinna leikinn," sagði Gylfi en Swansea var fyrir leikinn búið að spila fimm leiki í röð án þess að vinna.

„Þetta voru rosalega mikilvæg þrjú stig fyrir okkur. Þetta var mjög erfitt ekki síst eftir að við lentum 1-0 undir og stuðningsmennirnir þeirra voru vel með á nótunum. Við náðum að snúa leiknum við og landa sigrinum.  Við sýndum frábæran karakter," sagði Gylfi.

Þetta var annað mark Gylfa á tímabilinu en hann skoraði einnig úr vítaspyrnu í 3-1 tapi á móti Southampton.

Hér fyrir neðan má sjá þetta laglega mark hjá Gylfa.