Ellefu til viðbótar sakaðir um vanrækslu vegna sprenginganna í Tianjin

Kínversk yfirvöld hafa sakað ellefu embættismenn og hafnarstarfsmenn um að hafa sýnt af sér vanrækslu sem leiddi til sprenginganna í Tianjin þar sem 139 fórust fyrr í mánuðinum.

Í frétt BBC segir að ekki liggi fyrir hvort mennirnir hafi verið færðir í gæsluvarðhald.

Tólf yfirmenn fyrirtækja, flestir frá Ruihai International Logistics sem átti vöruskemmuna sem sprakk í loft upp, höfðu áður verið handteknir.

Spreningarnar urðu þann 12. ágúst síðastliðinn þar sem fleiri hundruð heimili eyðilögðust.

Að minnsta kosti 34 er enn saknað eftir sprengingarnar, fimm hundruð enn á sjúkrahúsi og þúsundir hafa enn ekki getað snúið til síns heima.

Atburðurinn hefur leitt til viðamikillar umræðu í landinu um geymslu á varasömum efnum.