200 stúlkum bjargað úr klóm Boko Haram

Nígerski herinn segist hafa bjargað 200 stúlkum og 93 konum úr höndum vígamanna Boko Haram í Sambisa-skógi í norðausturhluta landsins í dag. Talið er líklegt að um sé að ræða skólastúlkurnar sem rænt var fyrir ári síðan frá bænum Chibok en hefur það þó enn ekki verið staðfest.

Reuters greinir frá því að hermennirnir hefðu í aðgerðum sínum í dag eyðilagt þrjár búðir vígamannanna í Sambisa-skógi og náð þeim á sitt vald. Nú sé unnið að því að fá staðfest um hvaða konur sé að ræða.

Stúlknanna hefur verið saknað frá 14.apríl 2014. Þeim var rænt af heimavist frá bænum Chibok í norðausturhluta landsins og lýsti Boko Haram yfir ábyrgð á verknaðnum. Sagðist leiðtogi samtakanna ætla að selja þær í þrælahald og kynlífsánauð. Mikil óánægja hefur ríkt í Nígeríu og hafa stjórnvöld verið harðlega gagnrýnd fyrir að standa sig illa við leitina. Þau fullyrða þó að leitað hafi verið sleitulaust að stúlkunum frá hvarfi þeirra.

Öfgasamtökin Boko Haram hafa látið mikið að sér kveða síðustu ár og hafa þúsundir fallið í árásum þeirra í Nígeríu. Verknaðurinn er lýsandi fyrir samtökin sem segjast beita sér gegn vestrænum áhrifum og allri menntun með vestrænu sniði.

Uppfært kl. 22: Búið er að staðfesta að ekki sé um skólastúlkurnar að ræða.