Parísarborg hyggst lögsækja Fox vegna umfjöllunar um „múslimasvæði“

Anne Hidalgo, borgarstjóri Parísar, greindi frá því í dag að hún hyggst höfða mál gegn sjónvarpsstöðina Fox News fyrir fréttaflutning af meintum „múslimasvæðum“ í borginni. Segist Hidalgo í samtali við CNN telja að stöðin hafi „móðgað“ Parísarbúa.

Í kjölfar árásanna á húsnæði skoptímaritsins Charlie Hebdo fyrr í mánuðinum var nokkrum sinnum greint frá því á Fox News að í París, sem og öðrum stórborgum í Evrópu, séu stór svæði þar sem múslimar hafi komið á sjaría-lögum og fólk af öðrum trúarbrögðum hætti sér ekki þangað. Ekki einu sinni lögreglumenn þori að starfa þar.

Sami málflutningur á Íslandi

Engin svoleiðis svæði eru til í Frakklandi, þó öfgahópar sem berjast gegn múslímum hafi áður haldið þessu fram. Þess má geta að Margrét Friðriksdóttir hélt þessu einnig fram í viðtali við útvarpsþáttinn Harmageddon á dögunum.

„Til dæmis í Frakklandi eru yfir sjö hundruð svæði þar sem engir aðrir en múslimar þora inn,“ sagði Margrét þá. „Ekki einu sinni lögregla og slökkvilið. Þetta eru sér múslimasvæði sem enginn fer inn á nema múslimar.“

Sjá einnig: Yfir þúsund Íslendingar hafa látið sér líka við PEGIDA á Íslandi

Svæðin sem vísað er til kallast ZUS-svæði og eru svæði sem frönsk stjórnvöld skilgreindu árið 1997 sem staði sem þyrfti að veita sérstaka athygli þegar kæmi að uppbyggingu. Þau eru vissulega um sjö hundruð talsins en hafa ekkert með íslam að gera.

Ólíklegt að lögsókn nái árangri

Fulltrúar Fox News hafa beðist afsökunar á fullyrðingum sínum um múslimasvæðin meintu og dregið þær til baka að einhverju leyti. Michael Clemente, aðstoðarforstjóri Fox, segist þó ekki telja rétt að lögsækja stöðina vegna þeirra og segja sérfræðingar sem CNN hefur rætt við að ólíklegt verði að teljast að slík lögsókn bæri nokkurn árangur.

Frétt uppfært

Í fréttinni stóð áður að Margrét Friðriksdóttir væri talskona PEGIDA á Íslandi. Hið rétta er að hún hefur aðeins líkað við Facebook-síðuna Pegida Iceland er ekki talsmaður PEGIDA hér á landi. Margrét er beðin afsökunar á þessum misskilningi.