Bara stafrófið skilur á milli Chelsea og Manchester City

Chelsea og Manchester City eru efst og jöfn í ensku úrvalsdeildinni í fótbolta eftir leikina í 20. umferðinni sem fór öll fram í dag, nýársdag.

Chelsea var með þriggja stiga og þriggja marka forskot á Manchester City þegar nýtt ár rann í garð en mögnuð úrslit dagsins sáu til þess að bestu lið ensku úrvalsdeildarinnar eru nú nákvæmlega jöfn.

Manchester City vann fyrst 3-2 sigur á Sunderland og var því búið að ná Chelsea að stigum en var ennþá tveimur mörkum á eftir í markatölu.

Tveggja marka tap Chelsea á móti Tottenham á White Hart Lane, 5-3, þýddi hinsvegar að liðin voru með jafnmörg stig og nákvæmlega sömu markatölu, 44-19.

Tottenham komst tvisvar þremur mörkum yfir í leiknum en þau úrslit hefðu séð til þess að Chelsea hefði misst toppsætið til Manchester City.

Chelsea og Manchester City eru jafnframt með níu stigum meira en liðið í þriðja sæti sem er Manchester United.

Fimm efstu lið deildarinnar:

1	Chelsea	20	14	4	2	44 - 19	46
2	Manchester City	20	14	4	2	44 - 19	46
3	Manchester United	20	10	7	3	34 - 20	37
4	Southampton	20	11	3	6	34 - 15	36
5	Tottenham	20	10	4	6	29 - 27	34