Sjö ára gamall Lingard lét hjartað ráða för og valdi United frekar en Liverpool

Jesse Lingard, leikmaður Manchester United, gæti spilað sinn fyrsta landsleik fyrir England í kvöld og það á Wembley þegar enska liðið tekur á móti því franska.

Lingard, sem er 22 ára gamall, er búinn að vinna sér inn sæti í byrjunarliði Manchester United og skoraði sitt fyrsta mark á dögunum með flottu skoti fyrir utan teig á móti West Bromwich Albion.

Komi Lingard við sögu í kvöld verður hann 65. leikmaður Manchester United til að spila leik með enska landsliðinu, en hann var kallaður inn í hópinn fyrir tveimur dögum síðan vegna meiðsla í hópnum.

Lingard gat valið á milli Manchester United og Liverpool þegar hann var mjög ungur, en hann hefur verið í herbúðum United í 15 ár eða síðan hann var sjö ára gamall.

„Ég var að spila með hverfisliðinu mínu Penketh United þegar Mike Glennie, njósnari frá Manchester United, kom að fylgjast með mér,“ segir Lingard frá í tímariti Manchester United.

„Hann talaði við afa minn og bauð mér á reynslu en á þessum tíma hafði Liverpool einnig mikinn áhuga á mér. Ég þurfti að velja. Ég var ungur en hjartað sagði United á þeim tíma.“

„Það hefur verið ótrúleg lífsreynsla að komast úr undir sjö ára liðinu og á þann stað sem ég er núna. Þetta er alveg magnað og ég get ekki þakkað starfsliði Manchester United nógu mikið fyrir,“ segir Jesse Lingard.