Fámenni í Leifstöð á verkfallsdegi

Heldur fámennt er í Flugstöð Leifs Eiríkssonar í dag en nú standa yfir verkfallsaðgerðir flugmanna Icelandair.

„Með því að tilkynna þetta strax í gærmorgun tókst að afstýra annars fyrirsjáanlegu öngþveiti bæði hér og flugvöllum erlendis,“ segir Guðjón Arngrímsson, upplýsingafulltrúi Icelandair.

Fyrsta vinnustöðvun flugmanna hófst klukkan sex í morgun og mun standa yfir til klukkan sex í kvöld. Vegna aðgerðanna ákváðu forsvarsmenn Icelandair að fresta 26 flugum sem fyrirhuguð voru á því tímabili í dag.

„Þetta hefur gengið nokkuð vel á Keflavíkurflugvelli í morgun. Auðvitað verið örtröð í þjónustuverinu og söluskrifstofunni á Keflavíkurflugvelli en það var ekkert hægt að komast hjá því,“ segir Guðjón.

Langstærstur hluti þeirra 4500 ferðamanna sem áttu bókað í fyrrnefnd flug eru erlendir ferðamenn. Einhverjir þeirra voru ómeðvitaðir um verkfallsaðgerðir flugmanna og voru eitt stórt spurningamerki þegar þeir mættu í Leifstöð í morgun.

„Heilt yfir tókst að greiða úr þessu betur en á horfðist. Það hefur gengið þokkalega að leysa úr málum farþeganna,“ segir Guðjón.

Flugmenn mæta aftur til starfa klukkan sex í kvöld og reiknar Guðjón með því að flug geti hafist aftur um hálf átta leytið. Í kvöld eru á áætlun flug til Bandaríkjanna, Kanada auk Kaupmannahafnar og Óslóar.

Guðjón reiknar með því að seinkanir verði framan af degi á morgun en svo komist allt í eðlilegt horf.

„Við bindum vonir við það,“ segir Guðjón sem minnir þó á að yfirvinnubann geti haft þau áhrif að aflýsa þurfi flugi með stuttum fyrirvara.

„Við hvetjum fólk til að fylgjast vel með,“ segir Guðjón og minnir á vef Icelandair, vef Keflavíkurflugvallar auk umfjöllunar fjölmiðla.