Þurfi ekki að óttast bílnúmeralesara við Sorpu

„Síður en svo. Þetta er bara hugsað til að hjálpa okkur að greina á milli þess hvort við eigum að rukka þá sem koma með gjaldskylt rusl til okkar sem einstaklinga á höfuðborgarsvæðinu eða sem fyrirtæki.“

Ekki sjálfvirk gjaldtaka

Þannig sé ekki um sjálfvirka gjaldtöku að ræða, megintilgangur lesarans sé að skanna bílnúmer og greina hvort bílar séu á vegum fyrirtækja eða íbúa sem ekki eru frá höfuðborgarsvæðinu. „Sirka 75 prósent af þeim sem koma til okkar eru sannarlega íbúar á höfuðborgarsvæðinu, einhvers staðar á bilinu 25 til 35 prósent eftir því hvar þessi 75 prósent, hversu hátt þau ná, eru aðrir þannig það eru fyrirtæki utan höfuðborgarsvæðisins.“

Lítt þekkt staðreynd sé að Sorpa sé rekin að megninu til fyrir almannafé, skatta sem íbúar á höfuðborgarsvæðinu greiði samhliða fasteignagjöldum.

„Það er ástæðan fyrir því að ég og þú fáum þegar við erum bara í einkaerindum að koma með ákveðna flokka án þess að borga fyrir þá, en þetta eru flokkar sem fyrirtæki og fólk utan höfuðborgarsvæðisins borgar ekki fyrir, það borgar ekki fyrir þetta með sköttunum sínum og þarf þá að greiða fyrir við hlið.“

Fyrst var tilkynnt um búnaðinn í janúar síðastliðnum.

Búnaðinum komið upp við sex stöðvar Sorpu

Búnaðinum hefur verið komið upp við allar sex stöðvar Sorpu en Gunnar segir kostnað ekki mikinn. „Sérstaklega þegar þetta er sett í samhengi við það að íbúar á höfuðborgarsvæðinu borga 1,9 milljarð inn í reksturinn, þannig við erum í rauninni bara að slá skjaldborg utan um opinbert fé með þessu.“

Almennt sé ánægja með gjaldtöku hjá Sorpu. „Óánægjan snýst fyrst og fremst um það að vita ekki hvort þú þurfir að borga, þannig það er eitthvað sem við viljum bæta úr,“ segir Gunnar Dofri.

„Það kemur ekkert í heimabankann, þetta er allt saman gert við hliðið, það er engin sjálfvirk gjaldtaka, þetta er ekki spennuástandið sem þú ferð í gegnum þegar þú ferð í bílahús eða eitthvað svoleiðis heldur er öll greiðsla bara hérna hjá mínum mönnum í hliðinu.“