Wilson: Ótrúleg gleði sem fylgdi fyrsta markinu

James Wilson skráði sig í sögubækurnar hjá Manchester United á þriðjudagskvöldið þegar hann skoraði tvö mörk í fyrsta leik sínum fyrir aðallið félagsins er það lagði Hull, 3-1, í 37. umferð ensku úrvalsdeildarinnar.

Wilson hefur verið hjá Manchester United síðan hann var átta ára gamall en hann er landsliðsmaður U19 ára liðs Englands. Hann vill nú festa sér sæti í byrjunarliði félagsins.

„Ég tel mig vera nógu sterkan og fljótan til að ráða við þessa deild. Nú þarf ég bara að fá að spila eins marga leiki og ég get til að fá meiri reynslu,“ segir Wilson.

„Ef maður ætlar sér einhverja hluti hjá þessu félagi þarf maður auðvitað að skora á öllum stigum. Ég er kominn þetta langt og nú þarf ég bara að taka næsta skref.“

Wilson skoraði mörkin í sitthvorum hálfleiknum með föstum skotum úr teignum. Eðlilega var þessi 18 ára gamli strákur í skýjunum þegar hann skoraði fyrsta markið fyrir United á Old Trafford.

„Það var æðisleg tilfinningin. Eitthvað sem er ekki hægt að bera saman við neitt annað. Það var ótrúleg gleði sem fylgdi fyrra markinu og að skora annað var mögnuð upplifun.“

„Það er svolítið öðruvísi að spila fyrir framan 75,000 manns eða fyrir lítinn hóp fólks sem kemur að sjá U21-leikina. Upplifunin var enn betri út af öllu þessu fólki á vellinum,“ segir James Wilson.