„Við elskum að drekka blóð“

Liðsmenn Íslamska ríkisins, sem nú ráða stórum hluta landsvæðisins fyrir botni Miðjarðarhafs, hafa skotið heimsbyggðinni skelk í bringu með afhöfðunum sínum og fjöldamorðum en nú hefur meðlimur samtakanna stigið fram og sagt að samtökin hafi ánægju af því að „drekka blóð“.

Skæruliðinn Rabie Shehada, sem segir sig tilheyra Íslamska ríkinu og gengur iðulega undir nafninu „Palestínuslátrarinn“, lét ummælin falla í myndbandi sem birt var á netinu í vikunni og nálgast má með því að smella hér.

„Ég sver að við erum hópur fólks sem elskar dauðann rétt eins og þið elskið að lifa. Ég sver að við elskum að drekka blóð. Við komum hingað til að slátra ykkur,“ segir Shehada í myndskeiðinu. „Við elskum að deyja rétt eins og þið elskið að lifa,“ bætti hann við.

Shehada er 26 ára gamall og er talinn hafa fæðst í Nasaret í norðurhluta Ísraels en meirihluti íbúa svæðisins eru af arabískum uppruna.

Að sögn fréttamanns Al arabia lærði maðurinn vélarverkfræði í þrjá mánuði í Nasaret áður en hann hvarf úr háskólanum án nokkurra skýringa.

Síðar kom í ljós að hann hafði stungið af til Tyrklands þar sem hann hélt yfir landamærin til Sýrlands þar sem hann gekk til liðs við Sýrlenska frelsisherinn. Þaðan hafi hann svo flutt sig yfir til Íslamska ríkisins.

Í samtökunum tók hann svo upp skæruliðanafnið Abu Mussaab al-Saffouri í höfuðið á bænum Safouri nærri Nasaret.

Að sögn fréttamannsins er fjölskylda mannsins – spúsa hans og sonur – í miklu ójafnvægi eftir að ummælin mannsins rötuðu á netið og neita að tjá sig opinberlega um hann.

Utanríkisráðherrar fjölda ríkja hafa heitið því aðstoða írösk stjórnvöld í baráttu sinni gegn vígamönnum samtakanna. Verði „öllum ráðum beitt“ gegn samtökunum sem ráða yfir stórum landsvæðum í bæði Írak og Sýrlandi.  AP fréttaveitan segir þingmenn í Bandaríkjunum, sem nú ræða áætlun Obama um árásir gegn Íslamska ríkinu, telja að Bandaríkin muni dragast inn í annað stríð í Mið-Austurlöndum.