Lampard staðfestir brottför

Frank Lampard, miðjumaður Chelsea og enska landsliðsins, staðfesti í dag að hann væri á förum frá Chelsea. Lampard hefur verið orðaður við New York City undanfarnar vikur.

Lampard sem lék 648 leiki fyrir Chelsea á þrettán árum er einn af leikjahæstu leikmönnum í sögu Chelsea og skoraði Lampard í þeim 211 mörk. Á árunum þrettán vann Lampard fjöldan allra titla, þar á meðal ensku úrvalsdeildinna þrisvar og einu sinni Meistaradeildina.

„Þegar ég gekk til liðs við Chelsea fyrir 13 árum þá bjóst ég ekki við að ná jafn miklum árangri og raun bar vitni. Klúbburinn varð stór hluti lífs míns og ég á mörgum að þakka fyrir tíma minn hérna.“

„Öllum þjálfurunum, leikmönnunum og starfsfólkinu sem hefur verið hérna á sama tíma og ég. Ég hef lært margt og eignast marga vini á öllum þessum tíma. Einnig vill ég þakka aðdáendum Chelsea sem eru að mínu mati þeir bestu í heiminum. Þeir hafa stutt við bakið á mér, ekki einungis inn á vellinum heldur einnig utan vallar þegar ég átti við erfiðleika að stríða í einkalífinu.“

„Ég efast ekki að góður árangur félagsins muni halda áfram. Hvert sem ég fer þá mun Chelsea alltaf vera í hjarta mínu. Ég fæ vonandi betra tækifæri til þess að kveðja ykkur stuðningsmennina en þar til að því kemur vill ég bara þakka fyrir mig,“ sagði Lampard þakklátur.