Falcao: Stefni á Englandsmeistaratitilinn

Kólumbíski framherjinn Radamel Falcao segist stefna á Englandsmeistaratitilinn með sínum nýju liðsfélögum í Manchester United.

„Markmiðið er að skora mörk og vinna titla,“ sagði Falcao í samtali við FourFourTwo. „Við stefnum að því að vinna Englandsmeistaratitilinn á þessu tímabili. Ég vil hjálpa félagsliðinu mínu, sem og Kólumbíu sem undirbýr sig fyrir Copa America og HM 2018.

„Enska úrvalsdeildin er sterkasta deild í heimi. Bestu leikmennirnir spila þar og þú reynir þig gegn þeim bestu í hverri viku.“

Falcao, sem kom til United á eins árs lánssamningi frá Monaco, segir að enska liðið hafi verið á höttunum eftir honum síðustu mánuði.

„Önnur lið eins og Real Madrid höfðu áhuga, en ég vildi fara til Manchester United. Þetta er frábært félag með frábæra sögu sem fær mig til að trúa að ég geti staðið mig vel hér,“ sagði framherjinn sem hefur mikla trú á Louis van Gaal, knattspyrnustjóra United, þrátt fyrir að liðið hafi ekki enn unnið leik á tímabilinu.

„Það sáu allir á HM að van Gaal er í hópi bestu þjálfara heims. Hann skilur leikmennina sína og nær því besta út úr þeim - sem er mikilvægt ef leikmaður og lið ætla sér að ná árangri.“

Falcao gæti leikið sinn fyrsta leik fyrir Manchester United gegn QPR á Old Trafford á sunnudaginn.