Ebólusmitaðir kaupa blóð á svörtum markaði

Blóð úr þeim sem lifað hafa af ebólusmit gengur nú kaupum og sölum á svörtum markaði í Vestur-Afríku og hefur Alþjóðaheilbrigðisstofnunin sent frá sér viðvörun vegna þessa.

Engin lækning er til við sjúkdómnum og eru sýktir einstaklingar orðnir afar örvæntingafullir. Þó er talið að blóð úr einstaklingum sem lifað hafa sjúkdóminn af geti læknað hina sýktu. Þó nokkrir hafa fengið blóðgjafir úr þeim sem læknast hafa af veirunni og hefur það blásið fólki von í brjóst að loks sé komin lækning við þessum skæða sjúkdómi.  

Að minnsta kosti 2.400 hafa orðið faraldrinum að bráð og eru þúsundir sýktir. Faraldurinn er sagður stjórnlaus og sá skæðasti í sögunni. Allra leiða er því leitað til að finna lækningu við veirunni. Um sex bóluefni eru í þróun en hefur ekkert þeirra verið prófað af mönnum. Athygli hefur beinst að lyfinu ZMapp sem gefið var sjö sjúklingum, en létust tveir þeirra. Lyfið er þó uppurið og segir framleiðandi þess það taka marga mánuði að búa til fleiri skammta.