Gamlir geta slegið í gegn

Það vakti óneitanlega mikla athygli þegar fréttir bárust af því að Liverpool er í þann mund að ganga frá kaupunum á framherjanum Rickie Lambert frá Southampton.

Lambert er 32 ára gamall en er hugsaður sem varamaður fyrir Luis Suarez og Daniel Sturridge, tvo markahæstu leikmenn ensku úrvalsdeildarinnar á ný lokinni leiktíð.

Lambert átti mjög gott tímabil fyrir Southampton í vetur og eykur á breidd Liverpool liðsins en margir velta vöngum yfir því hvort Liverpool ætti ekki frekar að nota peningana í yngri leikmenn. Því er vert að skoða nokkur kaup á eldri leikmönnum sem gengið hafa skemmtilega upp.

Skotarnir og SheringhamSkotinn orðheppni, Gordon Strachan, fór frá Manchester United til Leeds United 32 ára gamall árið 1989. Leeds lék þá í annarri deild og var Strachan fyrirliði liðsins sem vann deildina strax um vorið 1990 og tryggði sér sæti í efstu deild á ný.

Strachan var enn fyrirliði liðsins þegar það varð enskur meistari vorið 1992 og lék mjög stórt hlutverk í liðinu.

Teddy Sheringham var 31 árs þegar  hann gekk til liðs við Manchester United og lék stórt hlutverk í liðinu sem vann alla titla sem í boði voru árið 1999, þá 33 ára gamall.

Sheringham var 38 ára gamall þegar hann gekk til liðs við West Ham árið 2004. Þar skoraði hann 20 mörk þegar liðið tryggði sér sæti í úrvalsdeildinni á ný. Enn var nógu mikið líf í skónum hans því hann lék með liðinu í deild þeirra bestu 39 ára gamall og skoraði 7 mörk.

Þá er rétt að nefna Gary McAllister sem kom til Liverpool 35 ára gamall árið 2000. Skotinn átti frábært tímabil og var lykilmaður í liði Liverpool sem vann hvern bikarinn á fætur öðrum auk þess sem liðið tryggði sér langþráð sæti í Meistaradeild Evrópu.