Ronald de Boer óttaðist van Gaal

Leikmenn Manchester United munu fá menningarsjokk þegar Louis van Gaal tekur við liðinu í sumar, að sögn Ronald de Boer.

De Boer þekkir vel til van Gaal eftir að hafa spilað undir hans stjórn hjá Ajax, Barcelona og hollenska landsliðinu.

Van Gaal var í gær ráðinn knattspyrnustjóri United og tekur við liðinu eftir að HM í Brasilíu lýkur í sumar.

„Hann er afar strangur,“ sagði De Boer í samtali við BBC. „Þegar ég var ungur óttaðist ég hann. En hann mun ná því besta úr leikmönnum United. Undir hans stjórn munu allir stefna í sömu átt og fylgja hans fordæmi.“

„Maður leggur aðeins meira á sig þegar maður veit að van Gaal er að horfa á mann.“