City fór á toppinn

Manchester City steig stórt skref í átt að Englandsmeistaratitlinum með sigri á Everton á Goodison Park í fimm marka leik.

Það var ungstirnið Ross Barkley sem kom heimamönnum yfir eftir 11 mínútna leik með glæsilegu skoti fyrir utan vítateig. Barkley valdi heldur betur rétta leikinn til að skora því landsliðsþjálfarinn Roy Hodgson fylgdist með leiknum á Goodison Park, en það verður að teljast ansi líklegt að Barkley verði í HM-hópi Englendinga í sumar.

Argentínumaðurinn Sergio Aguero jafnaði leikinn á 22. mínútu eftir sendingu frá Yaya Toure, en Aguero fór meiddur af velli eftir að hafa skorað.

Tveimur mínútum fyrir leikhlé kom Edin Dzeko Manchester City yfir og Bosníumaðurinn var aftur á ferðinni á 48. mínútu þegar hann skoraði eftir fyrirgjöf frá Samir Nasri. Dzeko hefur nú skorað 14 mörk í úrvalsdeildinni, en tíu þeirra hafa komið á útivelli.

Romelu Lukaku minnkaði muninn eftir 65 mínútna leik þegar hann skallaði fyrirgjöf Leightons Baines í netið, en nær komust Everton-menn ekki og gestirnir fögnuðu því 3-2 sigri sem gæti reynst gulls ígildi í baráttunni um enska meistaratitilinn.

Manchester City og Liverpool eru nú jöfn á toppi ensku úrvalsdeildarinnar með 80 stig. City er hins vegar með betri markatölu - +59 gegn +50 - situr því á toppnum. Bæði lið eiga tvo leiki eftir og vinni City þá verða þeir meistarar, nema markatala Liverpool stökkbreytist.

Everton situr í 5. sætinu og á ekki lengur möguleika á að ná Meistaradeildarsæti.