Góður sigur West Ham

West Ham vann góðan 2-0 sigur á Tottenham í fyrsta leik dagsins í ensku úrvalsdeildinni.

Lið Tottenham varð fyrir miklu áfalli eftir 25 mínútna leik þegar varnarmaðurinn Younes Kaboul var rekinn út af fyrir að brjóta á Stewart Downing sem var kominn einn í gegn.

Tveimur mínútum síðar komst West Ham yfir þegar Harry Kane skoraði sjálfsmark. Downing tvöfaldaði síðan forystu West Ham með marki beint úr aukaspyrnu mínútu fyrir leikhlé, en varnarveggur Tottenham leit afar illa út í markinu. Þetta var fyrsta mark Downings í ensku úrvalsdeildinni frá því í mars 2013.

Ekkert var skorað í seinni hálfleik og Hamrarnir fögnuðu því góðum og sanngjörnum sigri. West Ham var mun sterkari aðilinn í leiknum, en Tottenham gat þakkað markverðinum Hugo Lloris fyrir að ekki fór verr. Hann varði m.a. frábærlega frá Matt Taylor og Kevin Nolan, fyrirliða West Ham.

Gylfi Þór Sigurðsson var í byrjunarliði Tottenham, en var skipt af leikvelli á 66. mínútu.

West Ham situr nú í 12. sæti með 40 stig, en Tottenham í því 6. með 66 stig.

Rauða spjaldið og fyrra mark leiksins má sjá í spilaranum hér að ofan.