Líklega um slys að ræða þegar þyrla hrapaði í Afganistan

Líklegt þykir að um slys hafi verið að ræða þegar bresk herþyrla hrapaði í suðurhluta Afganistan í gær. Þetta hefur fréttastofa BBC eftir talsmanni varnarmálaráðherra Bretlands.

Fimm hermenn létu lífið í slysinu og allir voru þeir breskir ríkisborgarar. Málið er í rannsókn og hefur slysstaðurinn verið girtur af.

Talíbanar segjast hafa skotið þyrluna niður en í samtali við BBC segir Richard Kemp, fyrrverandi hershöfðingi, að algengt sé að Talíbanar eigni sér atvik sem þetta.

„Það er rós í hnappagat þeirra ef þeir hafa náð að skjóta niður breska herþyrlu en ef varnarmálaráðherra segir að um slys hafi verið að ræða trúi ég því,“ segir Kemp.