Rodgers: Leikmennirnir gáfu allt í leikinn

Liverpool beið í dag sinn fyrsta ósigur í ensku úrvalsdeildinni á þessu ári, en fyrir leikinn gegn Chelsea var liðið búið að vinna 11 leiki í röð.

"Ef þú skorar ekki fyrsta markið, þá geturðu ekki búist við að andstæðurinn komi úr skotgröfunum," sagði Brendan Rodgers, þjálfari Liverpool, eftir tapið gegn Chelsea í dag, en honum fannst ekki mikið til leikskipulags Chelsea koma.

"Það var augljóst að þeir voru ekki mættir til að vinna leikinn miðað við allar tafirnar og ég veit ekki hvað. Leikmennirnir gáfu allt í leikinn, en okkur skorti smá heppni."

"Við erum enn tveimur stigum á undan liði sem hefur eytt fúlgum fjár í leikmenn. Ef við vinnum þá tvo leiki sem við eigum eftir, þá endum við fyrir ofan þá og við verðum síðan að bíða og sjá hvað gerist með Manchester City."

Liverpool situr í toppsæti ensku úrvalsdeildarinnar með 80 stig.