Frábær árangur Chelsea gegn efstu liðunum

Fyrr í dag lagði Chelsea Liverpool að velli með tveimur mörkum frá Demba Ba og Willian. Eftir leikinn talaði Jose Mourinho, þjálfari Chelsea, um að fáir hefðu haft trú á hans liði í leiknum í dag og jafnvel búist við stórtapi.

Sigurinn þurfti þó ekki að koma á óvart miðað við gengi Chelsea gegn efstu liðum úrvalsdeildarinnar á tímabilinu.

Chelsea hefur tekið 27 stig af 36 mögulegum í tólf leikjum sínum gegn sjö efstu liðum deildarinnar. Liðið hefur unnið báða leikina gegn Liverpool og Manchester City, fengið fjögur stig úr leikjunum gegn Arsenal, Tottenham og Manchester United og þrjú stig gegn Everton, sem er eina liðið í efstu sjö sætum úrvalsdeildarinnar sem hefur unnið Chelsea á tímabilinu.

Chelsea hefur hins vegar verið duglegt við að tapa leikjum gegn liðum í neðri hluta deildarinnar. Fyrir utan tapið gegn Everton, þá hefur Chelsea tapað fyrir Newcastle (sem situr í 9. sæti eins og stendur), Stoke (10. sæti), Crystal Palace (11. sæti), Aston Villa (16. sæti) og Sunderland (17. sæti).

Stigin sem töpuðust í þeim leikjum gætu átt eftir að reynast Chelsea dýrkeypt í baráttunni um Englandsmeistaratitilinn. Liðið er í 2. sæti deildarinnar með 78 stig, tveimur færri en topplið Liverpool og einu stigi meira en Manchester City sem situr í 3. sæti, en á leik til góða.