Magath: Kaupin á Mitroglou engin mistök

Felix Magath, knattspyrnustjóri Fulham, telur það ekki hafa verið mistök hjá Fulham að kaupa gríska framherjann Kostas Mitroglou í janúar.

Rene Meulensteen, þáverandi stjóri Fulham, keypti Grikkjann fyrir tólf milljónir punda frá Olympiacos eftir að hann skoraði 17 mörk í öllum keppnum fyrir áramót.

Miklar væntingar voru gerðar til Mitroglou um að hann gæti hjálpað liðinu í fallbaráttunni en hann hefur aðeins komið tvisvar við sögu hjá liðinu í deildinni auk þess sem hann var ekki í leikformi þegar hann kom til liðsins.

„Það eru ekki margir kostir í boði ef þú vilt styrkja liðið þitt á miðju tímabili. Það eru ekki margir leikmenn sem þú getur fengið. Til lengri tíma litið þá er Mitroglou ekki að fara vera hérna í nokkrar vikur,“ segir Magath.

„Þess vegna eru þetta engin mistök. Hann er mjög góður framherji sem hefur ekki bara skorað í deildakeppni heldur líka í Meistaradeildinni.“

Fulham reyndi að kaupa AlfreðFinnbogason frá Heereveen í janúar áður en það sneri sér að Grikkjanum. Hann hefur ekkert gert á Craven Cottage á meðan Alfreð slær nú hvert metið á fætur öðru í markaskorun í Hollandi.