Heerenveen hafnaði tilboði Fulham í Alfreð

Enska úrvalsdeildarfélagið Fulham reyndi að kaupa íslenska landsliðsframherjann Alfreð Finnbogason frá hollenska liðinu Heerenveen í dag á lokadegi félagsskiptagluggans í Evrópu. Þetta kom fram í kvöldfréttum Stöðvar tvö.

Íþróttadeild Stöðvar tvö hefur heimildir fyrir því að hollenska félagið hafi hafnað tilboðinu sem er sagt að hafa verið í kringum tíu milljónir evra eða um 1,6 milljarða íslenskra króna.

Alfreð er markahæstur í hollensku úrvalsdeildinni með 19 mörk í aðeins 17 leikjum og hefur verið orðaður við fjölmörg félög í ensku úrvalsdeildinni.

Fulham var að leita sér að nýjum framherja og þegar félagi fékk ekki Alfreð þá ákváðu menn þar á bæ að kaupa gríska landsliðsframherjann Konstantinos Mitroglou í staðinn.