Robben: United ekki upp á sitt besta

Arjen Robben, leikmaður Evrópumeistara Bayern München, er ánægður með að mæta Manchester United í átta liða úrslitum Meistaradeildar Evrópu í fótbolta en dregið var í gær.

Manchester United hefur átt afleitu gengi að fagna á leiktíðinni nema í Meistaradeildinni þar sem það hefur aðeins tapað einu sinni í átta leikjum. Englandsmeistararnir eru þó ólíklegir til árangurs gegn sterku liði Bæjara.

„Þetta er góður dráttur því við spilum fyrri leikinn úti og þann síðari á heimavelli. Manchester United er ekki upp á sitt besta núna þannig ég hlakka til leikjanna,“ segir Arjen Robben.

Engu liði hefur tekist að verja titilinn í Meistaradeildinni síðan hún var sett á laggirnar árið 1992 en Bayern fær nú tækifæri til þess.