Van Persie missir af leikjunum gegn Bayern

Meiðsli Robin van Persie gætu reynst Manchester United dýrkeypt en í dag greindi félagið frá því að hann yrði frá næstu 4-6 vikurnar.

Van Persie skoraði þrennu í 3-0 sigri United á gríska liðinu Olympiakos í vikunni en sigurinn tryggði United sæti í fjórðungsúrslitum Meistaradeildar Evrópu.

Hann fékk hins vegar högg á hnéð í lok leiksins og var borinn af velli. Nánari skoðun hefur leitt í ljós að hann er tognaður og þarf að hvíla í rúman mánuð.

Í dag var dregið í 8-liða úrslit Meistaradeildarinar og fékk United það erfiða verkefni að mæta Evrópumeisturum Bayern München. Leikir liðanna fara fram í byrjun apríl og ljóst að hann missir af þeim, sem og Manchester-slagnum gegn City á þriðjudaginn.