Arsenal aflýsti blaðamannafundi Wenger í morgun

Ekkert varð af fyrirhuguðum blaðamannafundi Arsene Wenger, stjóra Arsenal, nú í morgun. Liðið tapaði um helgina fyrir Chelsea, 6-0, í þúsundasta leik félagsins undir stjórn Wenger.

Wenger mætti heldur ekki á venjubundinn blaðamannafund eftir leikinn en sagðist í viðtali sem birtist á heimasíðu félagsins í morgun vera furðu lostinn eftir tapið.

„Mér fannst við vel undirbúnir fyrir leikinn en svo kom í ljós að við vorum einfaldlega ekki með frá fyrstu mínútu,“ sagði Wenger. Arsenal er nú sjö stigum á eftir toppliði Chelsea og í fjórða sæti deildarinnar.

Enskir fjölmiðlar greindu frá því að leikmenn hafi verið boðaðir á fund á æfingasvæði félagsins í gær til að ræða tapið neyðarlega og hefja undirbúning fyrir leik Arsenal gegn Swansea á miðvikudag.

Arsenal hefur verið í toppbaráttu allt tímabilið en gefið verulega eftir. Þar að auki tapaði liðið fyrir Manchester City, 6-3, og 5-1 fyrir Liverpool eftir að hafa lent 4-0 undir á fyrstu 20 mínútum leiksins.

Wenger tók fulla ábyrgð á tapinu um helgina en þrátt fyrir allt segist fyrirliðinn Thomas Vermaelen ekki vera búinn að afskrifa möguleika liðsins í titilbaráttunni.

„Það eru enn nokkrir leikir eftir og í Englandi er allt mögulegt. Það hef ég lært. Allir geta unnið alla og við verðum bara að halda í trúna og gefast ekki upp.“