Robin Van Persie ánægður á Old Trafford og vill framlengja

Robin van Persie, framherji Manchester United, segist vilja endurnýja samninginn sinn á Old Trafford og gefur lítið fyrir þær sögusagnir að hann sé á útleið í sumar.

„Sannleikurinn er sá að ég er mjög ánægður hérna. Ég skrifaði undir fjögurra ára samning og verð ánægður hér lengur en það. Næstu tvö árin er ég með samning,“ segir Van Persie.

Einnig hefur mikið verið skrifað um að Hollendingurinn sé óánægður með þjálfunaraðferðir Davids Moyes en það er alrangt.

„Æfingarnar eru frábærar og ég læri fullt af þeim á hverjum degi. Á milli okkar ríkir gagnkvæm virðing og vinnuumhverfið er gott. Stjórinn vill að hlutirnir virki og ég líka,“ segir hann.

Þá var hann einnig spurður út í viðtöl sem hann hefur farið í að undanförnu. Í einu þeirra sagði hann liðsfélaga sína vera fyrir sér á vellinum.

„Það má telja viðtölin sem ég hef farið í á fingrum annarrar handar þannig kannski þegar ég segi ekki of mikið breytir fólk því í eitthvað rosalegt. Ég sé kannski 10 prósent af því sem er skrifað um mig en það sem ég hef lesið nýlega um það sem ég hef sagt er ekki byggt á sannleikanum,“ segir Robin van Persie.