Messan: Van Persie er ofboðslega erfiður

„Ég held þetta sé besta liðið sem Manchester United hefur upp á að bjóða,“ sagði Hjörvar Hafliðason, knattspyrnuspekingur, í Messunni á mánudagskvöldið um liðið sem David Moyes stillti upp gegn West Bromwich Albion um helgina.

Man. Utd vann öruggan 3-0 sigur og mætir Liverpool um næstu helgi.

„Hann hlýtur að spila svona á móti Liverpool um næstu helgi. Þetta er líka hafsentaparið sem hann á að nota. Jones er hafsent - ekki miðjumaður,“ sagði Hjörvar en ChrisSmalling og Phil Jones voru miðverðir í leiknum.

Aðspurðir hvort Moyes ætti að halda áfram að nota þá og geyma fyrirliðann NemanjaVidic á bekknum svaraði BjarniGuðjónsson:

„Það er ekki nokkur spurning. Hann er ekki að keppa að nokkrum sköpuðum hlut. Ég held þeir vilji frekar lenda í sjöunda sæti en fimmta [Evrópudeildarsæti] og fara peningaleiðina og spila sýningarleiki í Evrópu, Asíu og Bandaríkin.“

Hjörvar tók ekki undir það. „Ég er ekki sammála því. Ég held þeir muni alltaf vilja fara í Evrópukeppnina. Þeir geta fengið Fram þar,“ sagði hann og Bjarni brosti.

Robin van Persie hefur verið til vandræða á tímabilinu en hann var heppinn að fá ekki rautt spjald í leiknum og þá hefur hann látið ýmis orð falla í viðtölum sem strákarnir voru ekki vissir um að hefði gerst með Sir Alex Ferguson í brúnni.

„Hann er mjög hollenskur og ofboðslega erfiður,“ sagði Hjörvar og Bjarni bætti við:

„Hollendingar ráða ekki við sig. Þeir eru svo svakalega hreinskilnir. En með Ferguson væri þessi staða ekki uppi.“

Alla umræðuna um Manchester United úr Messunni má sjá í spilaranum hér að ofan.