Anelka hættur hjá West Brom

Nicolas Anelka rifti í dag samningi sínum við enska úrvalsdeildarliðið West Bromwich Albion vegna þess að hann sætti sig ekki við skilyrði sem honum voru sett. Þetta kemur fram á Sky Sports.

Enska knattspyrnusambandið dæmdi Anelka í fimm leika bann á dögunum fyrir umdeild fagnaðalæti sín en hann fagnaði marki í leik liðsins gegn West Ham þann 28. desember með því að líkja eftir þekktri nasistakveðju.

Forráðamenn West Bromwich Albion buðu Anelka í dag að halda áfram að spila með liðinu en aðeins ef hann fylgdi ákveðnum skilyrðum. Það sætti franski framherjinn sig ekki við og fékk sig lausan frá félaginu.

Nicolas Anelka er 35 ára gamall og hefur aðeins náð að leikja tólf leiki með WBA á þessu tímabili. Bæði mörkin hans komu í umræddum leik á móti West Ham.