Newcastle, Norwich og Tottenham áfrýja rauðum spjöldum

Þrjú ensk úrvalsdeildarlið hafa áfrýjað rauðu spjöldunum sem leikmenn liðanna fengu í leikjum sínum í gærkvöldi.

Danny Rose fékk að líta rautt í 5-1 tapi Tottenham gegn Manchester City fyrir að brjóta á Edin Dzeko. Rauða spjaldið fór ekki á loft fyrr en að Andre Marriner, dómari leiksins, hafði ráðfært sig við aðstoðardómara sinn.

Í leik Newcastle og Norwich lenti þeim Loic Remy og Bradley Johnson saman með þeim afleiðingum að báðum var vikið af velli. Bæði félög hafa ákveðið að áfrýja ákvörðun Chris Foy að reka leikmennina út af.

Remy virtist hafa skallað Johnson en Alan Pardew, stjóri Newcastle, gagnrýndi viðbrögð Johnson.

„Hann var ekki skallaður. Viðbrögðin urðu hins vegar til þess að báðir fengu rautt. Hefði ekki komið til þess hefði dómarinn ef til vill tekið mildari afstöðu til málsins,“ sagði Pardew eftir leikinn í gær.

Hann sagði einnig í gær að félagið myndi ekki áfrýja spjaldinu en forráðamenn Newcastle hafa ákveðið annað og sendu enska knattspyrnusambandinu erindi í dag, rétt eins og Norwich og Tottenham.