Vilja koma í veg fyrir bætt samskipti

Repúblikanar á Bandaríkjaþingi virðast ætla að gera allt sem í þeirra valdi stendur til þess að koma í veg fyrir að þýða skapist í samskiptum Bandaríkjamanna og íbúa á Kúbu. Forsetarnir Raul Castró og Barack Obama lýstu því yfir í vikunni að stjórnmálasamband á milli ríkjanna verði endurvakið en það hefur verið lítið sem ekkert í rúma fimm áratugi.

Þá hefur viðskiptabann einnig verið í gildi af hálfu Bandaríkjamanna. Ekki eru allir sáttir með þessi bættu samskipti og í gær sagði öldungadeildarþingmaður Flórída ríkis, Marco Rubio að þingið muni koma í veg fyrir að hægt verði að skipa bandarískan sendiherra á Kúbu, svo dæmi sé tekið.

Þá hafa fleiri andstæðingar áætlunarinnar stigið fram og heitið því að öllum fjárveitingarbeiðnum um aðgerðir sem miði að því að bæta samskiptin verði hafnað umsvifalaust á þinginu, sem lýtur stjórnar Repúblikana í báðum deildum næstu tvö árin hið minnsta.