Voru í safarí þegar þær heyrðu í sprengju­á­rás

Eins og fram hefur komið svöruðu Íranar og bandamenn þeirra árásum á landið með eldflauga- og drónaárásum á nágrannaríki Íran í Mið-Austurlöndum og herstöðvar Bandaríkjanna, þar á meðal í Dubai í Sameinuðu arabísku furstadæmunum.

Rétt að hefja heimsreisu

Þær Sigrún Heba Þorkelsdóttir, Sara Björk Þórðardóttir, Hafdís Anna Hauksdóttir og Magnea Steinunn H. Magnadóttir eru um tvítugt og hófu langþráða heimsreisu í borginni Dubai á föstudaginn og voru í skipulagðri ferð á laugardagsmorgun þegar þær heyrðu drunur í kringum sig. 

Magnea Steinunn segir þær vinkonur að mestu halda sig innan hótelsins.

„Við erum staddar i Dúbaí sem er fyrsta stoppið okkar i 2,5 mánaða reisu um Asíu. Eins og staðan er núna er lofthelgi UAE lokuð svo við erum fastar i borginni,“ segir Magnea í skriflegu svari því þær þurfa að nota 4G Internetið sem þær eru með til að hringja í fjölskyldu.

Magnea segir foreldra sína strax hafa haft samband við borgaraþjónustuna á laugardag og í kjölfarið hafi þær haft samband við danska og norska sendiráðið þar í landi til að láta vita af sér.

„Við áttum að fara á næsta áfangastað á sunnudagskvöldið og átti hópferðin að hefjast í dag en við erum enn fastar hér og líklega erum við búnar að missa af þeirri ferð eins og staðan er núna,“ segir Magnea.

Ferðin er skipulögð af ferðaskrifstofunni Kilroy og segir Magnea starfsfólk hafa ráðlagt þeim að framlengja gistinguna á hótelinu fram á miðvikudag, og að þær ættu að halda sig innandyra.

„Kilroy hafði svo samband við okkur í gærkvöldi og vonandi fara hlutirnir að skýrast betur. Það vita allir frekar lítið og það er ekki mikið hægt að gera nema bíða uppi á hóteli og bíða eftir frekari upplýsingum. Við erum fastar hér um óákveðinn tíma, ungar, hræddar og erfitt að taka á vandamálum sem maður hafði aldrei ímyndað sér að maður myndi lenda í. Mesta panik-ástandið var á laugardagsnóttina þar sem kom viðvörun i símana og lýst yfir neyðarástandi. Við vissum ekkert og földum okkur inni á baði,“ segir Magnea.

Hún segir að þó svo að ástandið sé erfitt sé ekki vesen að fá mat.

„Það eru matarsendlar starfandi hér á fullu svo við getum fengið mat sendan á hótelið. En það er kostnaðarsamt að vera í þessari borg og þetta var ekki peningur sem við vorum búnar að áætla að eyða. Símanúmerin okkar virka ekki og það eina sem við treystum á eru símtöl í gegnum net. Það er búið að virka vel en við erum bara með net á hótelinu eins og staðan er núna. Við erum í miklu sambandi við fjölskyldu og höfum komið okkur í samband við Íslendinga og Breta hérna úti sem hafa hjálpað okkur. Við fáum allar upplýsingar frá foreldrum okkar um stöðu mála og þau reyna að vinna í þessu eins mikið og þau geta heiman frá,“ segir Magnea.

Á öruggara hóteli

Rætt var við Dröfn Guðjónsdóttur, móður einnar þeirra, í hádegisfréttum Bylgjunnar í dag. 

„Á laugardagsmorgun fóru þær í safarí í eyðimörkinni. Þar heyra þær drunur yfir sér. Við höfum samband við þær vegna fréttanna af árásunum þannig að við látum þær í raun vita hvað er að gerast. Þær kláruðu þó ferðina og fóru upp á hótel þar sem þær hafa verið síðan. Við höfðum strax samband við borgaraþjónustuna til að reyna að koma þeim heim en flugvellir lokuðu eftir sprengjuárásina,“ segir Dröfn. 

Þær fóru nú rétt fyrir hádegi á annað hótel sem er stærra og öruggara að sögn Drafnar. Vonast sé til að þær komist frá borginni á miðvikudag.

Bera sig vel

„Eftir því sem við best vitum verður flugvöllurinn opnaður  á miðvikudag og þær komast vonandi frá borginni þá. Borgaraþjónustan hefur upplýst okkur um að þetta skýrist síðar í dag,“ segir hún. 

Hún segir að stelpurnar beri sig vel miðað við aðstæður. 

„Það eru náttúrulega alls kyns tilfinningar sem vakna í svona aðstæðum og þeim finnst óþægilegt að vakna við sprengjudrunur sem hafa verið í gangi annað slagið. Það getur verið erfitt að sofa við svona aðstæður. Það á bæði við um þær og okkur,“ segir Dröfn.