Rodgers: Sterling besti kantmaður landsins

Brendan Rodgers, stjóri Liverpool, lofaði mjög Raheem Sterling sem skoraði tvö marka liðsins í 5-1 sigri á Arsenal í ensku úrvalsdeildinni í dag.

Sterling átti frábæran dag eins og svo margir í liði Liverpool sem var komið í 4-0 forystu eftir 20 mínútna leik. Sterling var svo valinn maður leiksins.

„Hann er bara nýorðinn nítján ára gamall og ég held að það sé ekki til betri kantmaður á Englandi í dag. Hann er ótrúlegur,“ sagði Rodgers á blaðamannafundi eftir leikinn.

Rodgers sagðist ekki viss um að hans menn væru tilbúnir í að blanda sér í titilbaráttunna af fullri alvöru en sagði þó frammistöðuna í dag hafa verið stórbrotna.

„Það þarf bara að skoða leikmannahópinn okkar - eða bekkinn hjá Arsenal. En við vorum frábærir í dag,“ sagði Rodgers.

„Markmiðið hefur ávallt verið að ná eins góðum árnagri og mögulegt er. Við munum því bara gæta þess að vera áfram einbeittir.“