Liverpool steinlá | Arsenal og Aston Villa unnu

Fjórum leikjum er nú nýlokið í ensku úrvalsdeildinni en Liverpool gaf þá verulega eftir í baráttunni um Evrópusæti. QPR tapaði mikilvægum stigum í botnslagnum en talsvert bil er nú á milli þriggja neðstu liðanna og næstu liða fyrir ofan.

Southampton fékk Liverpool í heimsókn og vann sanngjarnan sigur, 3-1. Morgan Schneiderlin og Rickie Lambert komu liðinu yfir í fyrri hálfleik en Coutinho náði reyndar að klóra í bakkann fyrir gestina eftir að hafa hirt frákast af skoti Daniel Sturridge.

Liverpool spilaði betur í seinni hálfleik en gekk illa að skapa sér færi. Jay Rodriguez gerði svo út um leikinn þegar hann skoraði þriðja mark Southampton á 80. mínútu. Hann labbaði einfaldlega í gegnum vörn gestanna og skroraði eftir að hann fylgdi eftir fyrra skoti sínu sem Brad Jones varði.

Liverpool datt niður í sjöunda sæti deildarinnar en liðið er með 45 stig. Southampton er í fimmtánda sæti með 31 stig.

Arsenal komst upp í fimmta sæti deildarinnar með góðum 2-0 útisigri á Swansea. Nacho Monreal skoraði fyrra markið eftir darraðadans í teignum og Gervinho innsiglaði sigurinn í uppbótartíma með marki eftir skyndisókn.

QPR hefði getað komist upp úr fallsæti deildarinnar með sigri á Aston Villa og liðið komst yfir með marki Jermaine Jenas. Villa svaraði með tveimur mörkum en QPR náði að jafna áður en Christian Benteke tryggði Aston Villa sigurinn skömmu fyrir leikslok.

QPR komst þó nálægt því að jafna leikinn með síðustu spyrnu leiksins en Clint Hill skaut framhjá úr góðu færi.

QPR er því enn í neðsta sæti deildarinnar með 23 stig, rétt eins og Reading sem mætir Manchester United síðar í dag. Wigan er í átjánda sæti með 24 stig en á tvo leiki til góða. Aston Villa er nú með 30 stig í sautjánda sæti deildarinnar og er nú sex stigum frá fallsæti.

Stoke og West Brom gerðu markalaust jafntefli en með stiginu komst Stoke í hóp tíu efstu liða deildarinnar, þrátt fyrir að hafa einn leik á þessu ári.

Úrslit dagsins:

Swansea - Arsenal 0-2

0-1 Nacho Monreal (74.)

0-2 Gervinho (90+1.)

Aston Villa - QPR 3-2

0-1 Jermaine Jenas (23.)

1-1 Gabriel Agbonlahor (45+3.)

2-1 Andreas Weimann (59.)

2-2 Andros Townsend (73.)

3-2 Christian Benteke (81.)

Southampton - Liverpool 3-1

1-0 Morgan Schneiderlin (6.)

2-0 Rickie Lambert (33.)

2-1 Philippe Coutinho (45+1.)

3-1 Jay Rodriguez (80.)

Stoke - West Brom 0-0